Tuzing cu thawngpang tha ngai pakhat kan hun thei than. Europe ram 27 i fonh in khuakhan lairelnak EU Parliament nih “NUG le CRPH kan dirpi” tiah a fek mi biachahnak an hun tuah.
Hihi Kawl ralkap caah zanmang chia pakhat bantuk a si. Ziah tiahcun, uknak kaa tlaih ve, ram ka uk ve ti tung i, ramleng pawl (international community) nih cohlan lo hi ningzak ngai a si. A zei poi lo bantuk in an i umter len lai nain a chunglei cun an rak celh lomi a si.
๐๐จ chungtel tampi khi biatak ngai in thazaang a chuahmi an si. Kawlram democracy thlennak caah fimthiamnak le phaisa tampi an thawh. Sipuazi lei phihkharnak (santion) zong February 2021 hnu in voi (3) khengte an tuah cang.
๐จ๐ก nih NUG le CRPH kan cohlan, ti a um rih lo nain, U Kyaw Moe Tun tu cu a rian ning tein pehter ding ah a fiang tluk a si cang [Nizan zong ah UNGA 1st Committee meeting ah bia a chim cang kha…]. Kawl ralkap nih hmunhma an lak khawh lo paoh cu kannih caah tei phun khat ah ruat ko usih.
๐๐ฆ๐๐๐ก an lung aa tuaitam. Kawlram ca i ASEAN palai caah rian an khinh thar mi Erywan Yusof cu atu tiang Kawlram tlawnnak nawl an pe rih lo. Aung San Suu Kyi le a dang dodaltu pawl tonnak nawl kan pe lai lo, tiah Kawl ralkap nih an chimcia fawn. Mah hi Kawl ralkap nih “kan cohlan ko”, an timi ASEAN Five-Point Consensus kha a buar bantuk a si.
Cucaah, Kawl ralkap hi ASEAN hruaitu pawl meeting ah kaiter lo a fawite tiah Malaysia Foreign Minister nih a ti. Cu lawng si lo, ‘nan i duada tuk ahcun NUG he kan i pehtlai lai’ tiah a thihphaih hna. ASEAN hruaitu community chung hrimhrim zong ah mah bantuk ceihphainak a um len cang.
EU khi Kawlram he dengteo in pehtlaihnak an ngei lo nain dantatnak an tuahmi le NUG lei tu an cohlan mi nih Kawl ralkap cung ah hnahnawhnak tampi a pek khawh lai. UN ah hmunhma an ngei ti lo. Mah lio i, ASEAN nih a hun suaophau lo chap ahcun Kawl ralkap caah a fak ngaimi a si.
International community le ramdang nih hnon (isolate) tuah timi hi thil dintuai te a si lo. Khuate pakhat i, khua nawl buar ruang ah chiat-ni that-ni i zohkhenh lo ding ah hlawt mi chungkhar phun khi an dirhmun a si lai.
๐จ๐, ๐๐ฟ๐ฎ๐ป๐ฐ๐ฒ, ๐๐๐๐๐ฟ๐ฎ๐น๐ถ๐ฎ, ๐๐๐ฒ๐ฐ๐ต ๐น๐ฒ ๐ฆ๐ผ๐๐๐ต ๐๐ผ๐ฟ๐ฒ๐ฎ nih NUG palai zung hunnak nawl an pek hna. Ram le ram i pehtlaih (cozah le cozah siloin) a si caah diplomacy ning in Kawl ralkap control mi Embassy an pehtlaih rihmi tu khi cu a phung a si ko. NUG caah innka an hun piak mi hna tu cu Kawl ralkap zuamcawhtu thil pipa ngai a si lai.
๐จ๐ฆ dirhmun hi cu tampi chim chap a hau lo – hmaisuang bik a si zungzal. ๐๐ฎ๐ฝ๐ฎ๐ป cozah le Parliament nih dengteo in Kawl ralkap an mawhchiat. Kawlram mizapi lei ah an tang peng rih. ๐ก๐ฒ๐ ๐ญ๐ฒ๐ฎ๐น๐ฎ๐ป๐ฑ nih khin “Kawl ralkap hruaitu he pehtlaihnak kan chah” tiah February 2021 lio te khan an Prime Minister Jacinda nih a rak thanh cang. ๐๐ฟ๐ฎ๐ป๐ฐ๐ฒ khi EU parliament ah an i tel lawng si loin anmah France Senate hrim ah NUG cohlannak bia an chah ve cang.
๐๐ต๐ฎ๐ ๐น๐ฒ๐ถ ๐ถ๐ป, cu hlan ah Kawl ralkap a rak dirkamh peng tawntu ram cheukhat zong lung-awtawm in an hun um cuahmah. Hi hna pawl ko hi atu lio ahcun a biapimi an si. Ziah tiahcun, Kawl ralkap mithmai chia le pressure a pe kho biktu cu anmah hi an si.
Cu lak ah China hi khuaruahhar in nai hrawng a lung aa thleng. Kawl ralkap cung i, an lungdongh ngai ruang ah NLD le NUG leikap i mer phun in an hun um [NLD nih kum 5 uknak an rak tlaih chung ah khan pehtlaihnak zeimawzat an rak ser khawh ruang ah a si pah]. U Kyaw Moe Tun kong ah US he hnatlaknak an ser khawh mi zong kan hnu ah ka tial cang. Cucu NUG nih caantha ah a hun i lak i, biatak tein China he pehtlaihnak tha ser aa zuam cuahmah.
๐๐ป๐ฑ๐ถ๐ฎ khi atu lio ah pa zuangzam “rang pahnih cit” phun in Kawlram cung i foreign policy an i ngeih lio a si. China he regional politics ah zuamcawhnak sang tuk an ngeih ruang ah a si bik. Kawl ralkap he thuk tuk in an i pehtlai sual lai maw tiah an rak phan ngai mi a si.
Nain atu tiang ahcun thuk tuk in an kal hraw rih lo. Khat lei in, China hmanh a lung a hun i thlen lio ah Democracy ram ngan bik aa timi India pi nih Kawl ralkap thuk tuk in a kom ngam theng lai lo, tiah ruah a si.
๐ฅ๐๐๐๐ถ๐ฎ khi atu lio ahcun a dirhmun fiang lo bik ah ruah a si. Kawl ralkap lei ah a tang ngai rua kan ti lio ah ruah ning tluk in a rak tang lo. Min Aung Hlaing nih Russia ka tlawng ve, a ti i Putin nih a rak tong lo. Protocol sang bik i a ruah ahcun a ton awk te a si – an pom ngam taktak rih lo ti a lang. Nain, Russia nih hin NUG le mizapi lei kong cu zeihmanh aa theihter ve hlei rih lo.
๐ง๐ต๐ฎ๐ถ๐น๐ฎ๐ป๐ฑ khi a hramthawk ahcun Kawl ralkap lei tang dedeng phun in an rak um. An cozah lutlai pawl nih “anmah [Kawlram] ramchung buainak a si” tiah oltazak ngai in an rak chim. Nain, Kawl ralkap tuahsernak an hun hmuh taktak i an ruah ning a rak si lo. “I sum deuh uh” tiah Prime Minister Prayut nih a hun ti phah hna - Dictator ciocio hmanh ah Kawl ralkap sual ning hi cu an rak zoh sawh kho rua lo.
Kawlram buainak nih an [Thailand] chawhlehnak zeimawzat a hun hnursuan, ralzaam a tomtom nih an ramri an hun lonh, armed le drugs smuggle a hun karh, cu lio ah international pressure a hun i chap. Tikah, Thailand zong hi an ruah ning a si ti lo. Cucaah langhngan tuk in Kawl ralkap an dirkamh ngam ti lo.
๐๐ถ๐ฎ๐ฑ๐ผ๐ป๐ด๐ต๐ป๐ฎ๐ธ
Cu hlan i Kawlram democracy thlennak ca i, a rak kan dirkamh peng tawntu ram pawl nih pehzulh i an kan dirkamh rihmi khi hmuai ngei tukmi a si. Anmah national interest cu a hrampi a va si ko lai. Nain, ramchung lei thil sining (ground situation) kha an lung fiang lak in a chim phuangtu le forhfialnak a rak tuah kho tu ramkip ah kan rak ummi zong khi hmual a rak ngei tuk. An hmuh ning le an policy tiang impact a rak tuah khawh.
Cu lak ah Chin chung in “pumpak le phu” (individuals and organizations) kan rak i tel khawh peng mi zong khi hmai a hngal ngai. Kawlram thlennak ca i thazaang a chuah ngaimi ram pawl khi kutdong khiah in nan von rel ahcun an ramchung ah Kawlram mi tampi kan umnak a si kha, nan hmuh lai. Cu lak ah Chin mi tampi kan umnak ram khi an si deuh fawn lai.
Kawl ralkap a rak dirkamh tawntu ram pawl sin ah fak deuh in bia hun chim le pressure hun pek belte a biapi rih. ASEAN, Tuluk, Russia, Thailand tbk nih khin EU te, US te, Australia te bantuk in kanmah lei ah hun tang hna selaw hmuai a ngei bik hnga – saduhthah.
Nain, international politics ahcun national interest aa dan cio caah cu bantuk taktak cu a har lai. Mizapi lei an dir duh lo hmanh ah Kawl ralkap he thuk tuk in pehtlaihnak an tuah lo ding belte cu a lam kip in pressure pek khawh a si ve hnga.